(Izraelisot) – Ambasadori i Shqipërisë në Izrael, Bardhyl Canaj, priti në selinë e ambasadës, drejtoren e AJC-se (American Jewish Committee) dega Izrael, Avital Lejbovic, e cila në datat 26-28 Mars 2017 do të zhvillojë një vizitë pune në Shqipëri.

E ftuar nga Universiteti Mesdhetar i Tiranës, znj. Lejbovic do të marrë pjesë në seminarin me temë ” Roli i strategjik i Izraelit në Mesdheun Lindor”, ku do të mbajë një ligjëratë.

Zonja Lejbovic do të takohet me Nënkryetaren e Kuvendit, znj. Valentina Leskaj e cila njëkohësht kryen detyrën e Kryetares së Grupit Parlamentar të Miqësisë Shqipëri-Izrael, me Zv.Ministren e Jashtme, znj. Odeta Barbullushi, me deputetin dhe Kryetarin e Nderit të Universitetit Mesdhetar, Prof. Anastas Angjeli, etj.

Bashkëpunimi mes Ambasadës dhe AJC-së ka njohur një intensitet progresiv, i cili është materializuar me organizimin e dëgjesave, seminareve dhe debateve për kontributin e popullit shqiptar për shpëtimin e hebrenjve gjatë Luftës II Botërore, pasqyrimit të këtij kontributi në mediet izraelite,vizitave të drejtuesve të lartë të AJC në Shqipëri, si dhe vizitave të personaliteteve të vendit tonë në SHBA e Izrael.