Moses Lam dhe Troy Paquette janë partnerë në “Vitality Air”, një kompani që shet shishe me ajër  të marrë nga Parku Nacional i Banff-it në Kanada. Ajo që filloi si një shaka është kthyer në një biznes të vërtetë. Njerëz nga Kina, India, Meksika e SHBA-ja po blejnë shishe të “Vitality Air”. Këto nuk janë tanke të oksigjenit për qëllime mjekësore, konsumatorët thjesht duan të blejnë ajër të freskët.

Nga çdo shishe alumini me ajër të komprimuar mund të bësh midis 150-200 frymëmarrje. Në Kinë,  çdo ditë vdesin rreth 4000 veta për shkak të ndotjes së ajrit dhe tregu po rritet, por India  shikohet si një treg edhe më i madh.

Shishja, e shitur me pakicë kushton 20 dollarë, ndërsa çmimi me shumicë është shumë më i ulët. Vitin e kaluar kompania shiti 40,000 njësi dhe ata shpresojnë ta dyfishojnë shifrën në vitin 2018.

“Nëse Fixhi mund të shiste ujë, pse nuk mund ta shesë Kanadaja ajrin?”

Në 2014-ën, Lam dhe Paquette testuan idenë e tyre zbavitëse duke vënë një qese plastike të ajrit kanadez në “Ebay”. Çmimi ishte 99 cent.

“Na kushtoi 10.99 $ për ta dërguar atë, kështu që, në të vërtetë, kemi humbur paratë në atë dërgesë të parë”, tha Lam. Por djemtë vendosën ta provojnë përsëri dhe qesja e dytë e ajrit u shit tek një amerikan për 168 dollarë. Në vitin 2015, ata investuan rreth 1 milion dollarë për të nisur “Vitality Air”. 60,000 $  u shpenzuan për një kamion dhe 14,000 $  për rimorkion. Ata morën me qira një ndërtesë dhe e kthyen atë në një dhomë të pastër për të paketuar ajrin.

Paquette tha se agjentët e doganave nga vende të ndryshme ishin të hutuar nga kjo shpikje në dukje e re për konsumatorët, edhe pse ekzistonin produkte të tjera të ajrit të kompresuar. Të dy burrat u detyruan të marrin kurse të veçanta se si të mbledhin dhe të transportonin ajrin, të cilat u kushtuan më shumë se 250,000 dollarë.

Në qershor të atij viti, ata shitën kutinë e tyre të parë. Shitjet e “Vitality Air” për atë vit ishin vetëm 30,000 dollarë. Në 2016 -ën  ata u rritën në 230,000 dollarë, vazhduan të rriteshin edhe në vitin 2017 dhe për 2018-ën, parashikojnë të arrijnë në 500,000 dollarë. Kompania tashmë ka edhe një degë në Korenë e Jugut, të quajtur “Jiri Air”, e cila e merr ajrin nga malet në pjesën jugore të Gadishullit Korean.