Ambasadori i Izraelit në Shqipëri, Boaz Rodkin, i shoqëruar nga zëvendësambasadorja Liora Peleg, u takuan në ambientet e Televizionit Shqiptar me këngëtaren Jonida Maliqi, e cila do të marrë pjesë në Festivalin Europian të Këngës (Eurovision 2019), i cili do të zhvillohet në 14-18 maj në Tel Aviv.

“Shqipëria është gati për Eurovizion këtë vit në Tel Aviv. Sot Ambasadori dhe unë shkuam për të parë provën e këngëtares shqiptare Jonida Maliqi, dhe u habitëm nga zëri dhe performanca e saj e bukur. Ne i urojmë Shqipërisë sukses të madh në Eurovizion 2019”, shkruan zëvendësambasadorja Liora Peleg në një postim të saj në Facebook.

Këngëtarja Maliqi, e cila do të prezantohet në natën e dytë gjysmëfinale me këngën “Ktheju tokës”, shoqërohej nga autorja dhe kompozitorja e këngës, Eriona Rushiti, dhe një pjesë e stafit të saj dhe drejtues të niveleve të ndryshme të RTSH-së.