Dr. Maurit Beeri, Drejtore e Përgjithshme në Qendrën e Rehabilitimit të Peadiatrisë dhe Adoleshentëve të Spitalit Alyn në Jerusalem, ishte përfaqësuese e Shtetit të Izraelit në “Kongresin botëror për Persona me Aftësi të Kufizuara”, i pari i tillë në Republikën e Kosovës, nën organizimin e znj. Elvana Shala, Ambasadore e Vullnetit të Mirë për Kosovën.

Dr. Beeri ishte paneliste ne temën “Implementimi dhe zbatimi i ligjeve për personat me aftësi të kufizuara në Kosovë”. Ajo foli për rrugëtimin e Izraelit drejt avancimit të standardeve për trajtimin e personave me aftësi të kufizuara, theksoi rëndësinë e gjithëpërfshirjes në këtë fushë, duke përfshirë edhe angazhimin e personave me aftësi të kufizuara dhe/apo prindërve të tyre në poste drejtuese qeveritare. Dr. Beeri përmendi fakti që qeveria izraelite ka një ministre e cila përdor karrocë me rrota.

Mbi 150 persona me aftësi të kufizuara nga Kosova, zyrtarë shtetërorë, pjesëtarë të korit diplomatik në Kosovë, diplomatë nga mbarë bota dhe përfaqësues të organizatave të shoqërisë civile morën pjesë në këtë ngjarje të titulluar “Bashkë për gjithëpërfshirje dhe mirëqenie”.

Viti 2022 është shpallur zyrtarisht nga Qeveria e Kosovës si Vit i Personave me Aftësi të Kufizuara.

Shteti i Izraelit i ka dhuruar afro 100 karroca për personat me aftësi të kufizuara në Republikën e Kosovës.