Mund të jetë edhe një rastësi!

Por, Izraeli ka emëruar ambasadore femra në Shqipëri (mbulon edhe Bosnjë-Hercegovinën), Kosovë, Maqedoninë e Veriut dhe Turqi.

Në Shqipëri, ambasadore është Galit Peleg, shumë aktive në thellimin e marrëdhënieve midis dy vendeve, dhe që ka një vlerësim maksimal për trajtimin e veçantë që i bëhet Izraelit. Kryeministri Edi Rama organizoi ndezjen e qiriut të pestë të Hanukkah në selinë e Kryeministrisë, ndërkohë që zhvilloi në muajin tetor një vizitë të suksesshme në Izrael. Peleg mbulon gjithashtu edhe Bosnjë-Hercegovinën.

Në Kosovë, ambasadore është Tamar Ziv. Këtë vit u organizua për herë të parë me iniciativën e Ambasadës së Izraelit në Kosovë, edhe ndezja e qirinjve me rastin e festës hebraike Hanukkah. Izraelin e kanë vizituar një numër i madh ministrash nga Kosova dhe janë nënshkruar disa marrëveshje dypalëshe.

Në Maqedoninë e Veriut, ambasadore është Simona Frankel, e cila pasoi Dan Oryan, aktualisht shefi i zyrës për Ballkanin në Ministrinë e Jashtme të Izraelit.

Në Turqi, ambasadore është Irit Lillian, e cila të martën paraqiti letrat kredenciale te Presidenti Rexhep Taip Erdogan, duke shënuar një erë të re midis dy vendeve. Lillian, një diplomate e lartë që luajti një rol kyç në pajtimin izraelito-turk, shërbeu për dy vitet e fundit si e ngarkuar me punë në Ambasadën izraelite në Ankara. Para kësaj, ajo ishte ambasadore e Izraelit në Bullgari nga viti 2015 deri në vitin 2019.

Diplomacia femërore mesa duket funksionon shkëlqyeshëm, kjo edhe për faktin se marrëdhëniet e Izraelit me këto vende po konsolidohen dhe po zhvillohen në marrëdhënie me përfitim të dyanshëm, përfshirë edhe aspektin ekonomik.