Nga Chabad of Albania

A e dini se në Izrael ka dhe një “ditëlindje për pemët”?

Ajo quhet “Tu BiShvat”. “Tu Bishvat” quhet ndryshe edhe “Festa e frutave”, apo edhe “Viti i ri i pemëve”

Këtë vit, ajo fillon sot, më 5 shkurt 2023, me perëndimin e diellit dhe përfundon nesër, 6 shkurt, po më përëndimin e diellit.

Është një festë 24-orëshe, dhe konsiderohet si “ditëlindja” e të gjitha pemëve që bëjnë fruta.

Emri Tu B’Shvat vjen nga dita hebraike e festes, e cila ndodh në ditën e 15-të të Shevat.

“Tu” janë në hebraisht shkronjat Tet dhe Vav, të cila bashkërisht kanë vlerën numerike 9 dhe 6, të cilat po të mblidhen së bashku bëjnë 15.

Tu B’Shvat shfaqet në Mishnah, i njohur si Bibla gojore, në Traktatin Rosh Hashanah (viti i ri), si një  nga katër vitet e rinj në kalendarin hebraik.

Në kohët e vjetra, “Tu BiShvat” ishte thjesht një datë kalendari, që i ndihmonte fermerët hebrenj, të përcaktoni saktësisht se kur duhet të sillnin prodhimet e tyre të frutave nga pemët e mbjella së fundi në Tempull, si prodhim i parë i tyre.

Në kohët moderne, “Tu BiShvat” vazhdon të jetë një mundësi për mbjellje e pemëve – në Izrael dhe kudo tjetër ku jetojnë hebrenjtë.

Hebrenjtë e festojnë “vitin e ri të pemëve”, duke ngrënë fruta të njoma apo të thata të tilla si rrush, fiq, shegë, ullinj apo dardhë.

Në Izraelin e kohëve të sotme, dita festohet edhe si një ditë ekologjike me mbjellje pemësh.