Spitali Onkologjik në Qendrën Spitalore Universitare “Nënë Tereza” do të transformohet në një shërbim nga më bashkëkohorët, duke çelur një kapitull të ri progresi për shërbimin publik spitalor falë bashkëpunimit me Sheba Medical Center të Izraelit, një nga ekselencat botërore të mjekësisë që nga sot është zyrtarisht partneri strategjik i QSUNT.

Ky bashkëpunim synon forcimin e kapaciteteve të shërbimit onkologjik, rritjen e standardeve dhe ofrimin e zgjidhjeve moderne për shëndetin e qytetarëve.

Kryeministri Edi Rama ishte sot në mjediset e QSUNT, së bashku me ministren e Shëndetësisë dhe Mbrojtjes Sociale, ku në një takim me stafin e mjekëve të Qendrës, u prezantua plani i ri i veprimit për Onkologjikun, i cili është gati sipas standardeve më të mira ndërkombëtare për një hop të madh cilësor të kujdesit ndaj pacientëve.

“Ky nuk është një partneritet formal, nuk është as një shkëmbim rastësor ose sporadik eksperience, por është një aleancë strategjike, e bazuar në mirëkuptimin se krah për krah me lidershipin e spitalit Sheba, krah për krah me mjekët e spitalit Sheba, ne do të arrijmë të krijojmë një sinergji që do ta bëjë në këtë periudhë disa vjeçare që kemi përpara, Qendrën spitalore Universitare 2030 një shëmbëlltyrë ekselence për Shqipërinë dhe gjithë rajonin”, – u shpreh ndër të tjera në fjalën e tij, Kryeministri Rama.