Tirane, 13 shkurt 2015 – Presidenti i Republikës, Sh.T.Z. Bujar Nishani vlerësoi sot Ambasadorin e Shtetit të Izraelit në Tiranë, David Cohen me Titullin “Për Merita të Veçanta Civile” për veprimtarinë dhe kontributin e rëndësishëm diplomatik në intensifikimin e gjithanshëm të marrëdhënieve mes Republikës së Shqipërisë dhe Shtetit të Izraelit, veçanërisht të marrëdhënieve politike, ekonomike, tregtare dhe kulturore, si dhe për ndihmesën e vyer në ripërtëritjen e lidhjeve historike mes popullit shqiptar dhe atij hebre.

Në fjalën e rastit, Presidenti Nishani vuri në dukje se: “Veprimtaria e pareshtur dhe kontributet e një miku të Shqipërisë dhe popullit shqiptar për të zgjeruar dhe thelluar bashkëpunimin, miqësinë, mirëkuptimin, ndjenjën e afërsisë, rritjen e investimeve, ofrimin dhe dhënien pa rezerva të përvojës së pasur izraelite në shumë fusha me interes të përbashkët, kanë hijeshuar misionin diplomatik të Ambasadorit Cohen në vendin tonë.

Falë përvojës së tij të pasur diplomatike e të shtrirë në tre kontinente, Ambasadori Cohen ka dhënë një kontribut të shkëlqyer për zhvillimin gjithnjë në rritje të marrëdhënieve tregtare dhe ekonomike, bujqësore dhe energjetike. Shumë e vyer ka qenë ndihma për forcimin e shkëmbimeve në fushën e kulturës, si dhe për prezantimin e zakoneve dhe traditave fisnike që karakterizojnë të dy popujt tanë.”

Kreu i Shtetit theksoi gjithashtu se ka nderin dhe privilegjin të vlerësojë e të nderojë duke shprehur mirënjohjen edhe në emër të qytetarëve shqiptarë, kontributin e qenësishëm diplomatik të Ambasadorit Cohen në intensifikimin e gjithanshëm të marrëdhënieve politike, ekonomike, tregtare dhe kulturore mes Shqipërisë dhe Shtetit të Izraelit.